శ్రీ లలితా త్రిశతీ స్తోత్రరత్నం

శ్రీలలితాత్రిశతీస్తోత్రం

సూత ఉవాచ-
అస్య శ్రీలలితాత్రిశతీస్తోత్రమహామంత్రస్య - భగవాన్ హయగ్రీవఋషిః - అనుష్టుప్ ఛందః శ్రీలలితామహాత్రిపురసుందరీ దేవతా - ఐం బీజం - సౌః శక్తిః - క్లీం కీలకం - మమ చతుర్విధ పురుషార్థఫలసిద్ధ్యర్థే జపే వినియోగః |
ఐమిత్యాదిభిరంగన్యాసకరన్యాసాః కార్యాః |

ధ్యానం-
అతిమధురచాపహస్తామ్ అపరిమితామోదబాణసౌభాగ్యామ్ |
అరుణామతిశయకరుణామ్ అభినవకులసుందరీం వందే |

శ్రీ హయగ్రీవ ఉవాచ-
కకారరూపా కళ్యాణీ కళ్యాణగుణశాలినీ |
కళ్యాణశైలనిలయా కమనీయా కళావతీ || ౧ ||

కమలాక్షీ కల్మషఘ్నీ కరుణామృతసాగరా |
కదంబకాననావాసా కదంబకుసుమప్రియా || ౨ ||

కందర్పవిద్యా కందర్పజనకాపాంగవీక్షణా |
కర్పూరవీటిసౌరభ్యకల్లోలితకకుప్తటా || ౩ ||

కలిదోషహరా కంజలోచనా కమ్రవిగ్రహా |
కర్మాదిసాక్షిణీ కారయిత్రీ కర్మఫలప్రదా || ౪ ||

ఏకారరూపా చైకాక్షర్యేకానేకాక్షరాకృతిః |
ఏతత్తదిత్యనిర్దేశ్యా చైకానందచిదాకృతిః || ౫ ||

ఏవమిత్యాగమాబోధ్యా చైకభక్తిమదర్చితా |
ఏకాగ్రచిత్తనిర్ధ్యాతా చైషణారహితాద్దృతా || ౬ ||

ఏలాసుగంధిచికురా చైనఃకూటవినాశినీ |
ఏకభోగా చైకరసా చైకైశ్వర్యప్రదాయినీ || ౭ ||

ఏకాతపత్రసామ్రాజ్యప్రదా చైకాంతపూజితా |
ఏధమానప్రభా చైజదనేజజ్జగదీశ్వరీ || ౮ ||

ఏకవీరదిసంసేవ్యా చైకప్రాభవశాలినీ |
ఈకారరూపా చేశిత్రీ చేప్సితార్థప్రదాయినీ || ౯ ||

ఈద్దృగిత్యవినిర్దేశ్యా చేశ్వరత్వవిధాయినీ |
ఈశానాదిబ్రహ్మమయీ చేశిత్వాద్యష్టసిద్ధిదా || ౧౦ ||

ఈక్షిత్రీక్షణసృష్టాండకోటిరీశ్వరవల్లభా |
ఈడితా చేశ్వరార్ధాంగశరీరేశాధిదేవతా || ౧౧ ||

ఈశ్వరప్రేరణకరీ చేశతాండవసాక్షిణీ |
ఈశ్వరోత్సంగనిలయా చేతిబాధావినాశినీ || ౧౨ ||

ఈహావిరాహితా చేశశక్తిరీషత్స్మితాననా |
లకారరూపా లలితా లక్ష్మీవాణీనిషేవితా || ౧౩ ||

లాకినీ లలనారూపా లసద్దాడిమపాటలా |
లలంతికాలసత్ఫాలా లలాటనయనార్చితా || ౧౪ ||

లక్షణోజ్జ్వలదివ్యాంగీ లక్షకోట్యండనాయికా |
లక్ష్యార్థా లక్షణాగమ్యా లబ్ధకామా లతాతనుః || ౧౫ ||

లలామరాజదళికా లంబముక్తాలతాంచితా |
లంబోదరప్రసూర్లభ్యా లజ్జాఢ్యా లయవర్జితా || ౧౬ ||

హ్రీంకారరూపా హ్రీంకారనిలయా హ్రీంపదప్రియా |
హ్రీంకారబీజా హ్రీంకారమంత్రా హ్రీంకారలక్షణా || ౧౭ ||

హ్రీంకారజపసుప్రీతా హ్రీంమతీ హ్రీంవిభూషణా |
హ్రీంశీలా హ్రీంపదారాధ్యా హ్రీంగర్భా హ్రీంపదాభిధా || ౧౮ ||

హ్రీంకారవాచ్యా హ్రీంకారపూజ్యా హ్రీంకారపీఠికా |
హ్రీంకారవేద్యా హ్రీంకారచింత్యా హ్రీం హ్రీంశరీరిణీ || ౧౯ ||

హకారరూపా హలధృత్పూజితా హరిణేక్షణా |
హరప్రియా హరారాధ్యా హరిబ్రహ్మేంద్రవందితా || ౨౦ ||

హయారూఢాసేవితాంఘ్రిః హయమేధసమర్చితా |
హర్యక్షవాహనా హంసవాహనా హతదానవా || ౨౧ ||

హత్యాదిపాపశమనీ హరిదశ్వాదిసేవితా |
హస్తికుంభోత్తుంగకుచా హస్తికృత్తిప్రియాంగనా || ౨౨ ||

హరిద్రాకుంకుమాదిగ్ధా హర్యశ్వాద్యమరార్చితా |
హరికేశసఖీ హాదివిద్యా హాలామదాలసా || ౨౩ ||

సకారరూపా సర్వజ్ఞా సర్వేశీ సర్వమంగళా |
సర్వకర్త్రీ సర్వభర్త్రీ సర్వహంత్రీ సనాతనీ || ౨౪ ||

సర్వానవద్యా సర్వాంగసుందరీ సర్వసాక్షిణీ |
సర్వాత్మికా సర్వసౌఖ్యదాత్రీ సర్వవిమోహినీ || ౨౫ ||

సర్వాధారా సర్వగతా సర్వావగుణవర్జితా |
సర్వారుణా సర్వమాతా సర్వాభూషణభూషితా || ౨౬ ||

కకారార్థా కాలహంత్రీ కామేశీ కామితార్థదా |
కామసంజీవినీ కల్యా కఠినస్తనమండలా || ౨౭ ||

కరభోరుః కళానాథముఖీ కచజితాంబుదా |
కటాక్షస్యందికరుణా కపాలిప్రాణనాయికా || ౨౮ ||

కారుణ్యవిగ్రహా కాంతా కాంతిధూతజపావళిః |
కలాలాపా కంబుకంఠీ కరనిర్జితపల్లవా || ౨౯ ||

కల్పవల్లీసమభుజా కస్తూరీతిలకాంచితా |
హకారార్థా హంసగతిః హాటకాభరణోజ్జ్వలా || ౩౦ ||

హారహారికుచాభోగా హాకినీ హల్యవర్జితా |
హరిత్పతిసమారాధ్యా హఠాత్కారహతాసురా || ౩౧ ||

హర్షప్రదా హవిర్భోక్త్రీ హార్దసంతమసాపహా |
హల్లీహాలాస్యసంతుష్టా హంసమంత్రార్థరూపిణీ || ౩౨ ||

హానోపాదాననిర్ముక్తా హర్షిణీ హరిసోదరీ |
హాహాహూహూముఖస్తుత్యా హానివృద్ధివివర్జితా || ౩౩ ||

హయ్యంగవీనహృదయా హరికోపారుణాంశుకా |
లకారాఖ్యా లతాపూజ్యా లయస్థిత్యుద్భవేశ్వరీ || ౩౪ ||

లాస్యదర్శనసంతుష్టా లాభాలాభవివర్జితా |
లంఘ్యేతరాజ్ఞా లావణ్యశాలినీ లఘుసిద్ధిదా || ౩౫ ||

లాక్షారససవర్ణాభా లక్ష్మణాగ్రజపూజితా |
లభ్యేతరా లబ్ధభక్తిసులభా లాంగలాయుధా || ౩౬ ||

లగ్నచామరహస్తశ్రీశారదాపరివీజితా |
లజ్జాపదసమారాధ్యా లంపటా లకులేశ్వరీ || ౩౭ ||

లబ్ధమానా లబ్ధరసా లబ్ధసంపత్సమున్నతిః |
హ్రీంకారిణీ హ్రీంకరిది-ర్హ్రీంమధ్యా హ్రీంశిఖామణిః || ౩౮ ||

హ్రీంకారకుండాగ్నిశిఖా హ్రీంకారశశిచంద్రికా |
హ్రీంకారభాస్కరరుచిః హ్రీంకారాంభోదచంచలా || ౩౯ ||

హ్రీంకారకందాంకురికా హ్రీంకారైకపరాయణా |
హ్రీంకారదీర్ఘికాహంసీ హ్రీంకారోద్యానకేకినీ || ౪౦ ||

హ్రీంకారారణ్యహరిణీ హ్రీంకారావాలవల్లరీ |
హ్రీంకారపంజరశుకీ హ్రీంకారాంగణదీపికా || ౪౧ ||

హ్రీంకారకందరాసింహీ హ్రీంకారాంభోజభృంగికా |
హ్రీంకారసుమనోమాధ్వీ హ్రీంకారతరుమంజరీ || ౪౨ ||

సకారాఖ్యా సమరసా సకలాగమసంస్తుతా |
సర్వవేదాంతతాత్పర్యభూమిః సదసదాశ్రయా || ౪౩ ||

సకలా సచ్చిదానందా సాధ్యా సద్గతిదాయినీ |
సనకాదిమునిధ్యేయా సదాశివకుటుంబినీ || ౪౪ ||

సకాలాధిష్ఠానరూపా సత్యరూపా సమాకృతిః |
సర్వప్రపంచనిర్మాత్రీ సమనాధికవర్జితా || ౪౫ ||

సర్వోత్తుంగా సంగహీనా సద్గుణా సకలేష్టదా |
కకారిణీ కావ్యలోలా కామేశ్వరమనోహరా || ౪౬ ||

కామేశ్వరప్రాణనాడీ కామేశోత్సంగవాసినీ |
కామేశ్వరాలింగితాంగీ కామేశ్వరసుఖప్రదా || ౪౭ ||

కామేశ్వరప్రణయినీ కామేశ్వరవిలాసినీ |
కామేశ్వరతపస్సిద్ధిః కామేశ్వరమనఃప్రియా || ౪౮ ||

కామేశ్వరప్రాణనాథా కామేశ్వరవిమోహినీ |
కామేశ్వరబ్రహ్మవిద్యా కామేశ్వరగృహేశ్వరీ || ౪౯ ||

కామేశ్వరాహ్లాదకరీ కామేశ్వరమహేశ్వరీ |
కామేశ్వరీ కామకోటినిలయా కాంక్షితార్థదా || ౫౦ ||

లకారిణీ లబ్ధరూపా లబ్ధధీర్లబ్ధవాంచితా |
లబ్ధపాపమనోదూరా లబ్ధాహంకారదుర్గమా || ౫౧ ||

లబ్ధశక్తిర్లబ్ధదేహా లబ్ధైశ్వర్యసమున్నతిః |
లబ్ధబుద్ధిర్లబ్ధలీలా లబ్ధయౌవనశాలినీ || ౫౨ ||

లబ్ధాతిశయసర్వాంగసౌందర్యా లబ్ధవిభ్రమా |
లబ్ధరాగా లబ్ధగతిర్లబ్ధనానాగమస్థితిః || ౫౩ ||

లబ్ధభోగా లబ్ధసుఖా లబ్ధహర్షాభిపూజితా |
హ్రీంకారమూర్తి-ర్హ్రీంకారసౌధశృంగకపోతికా || ౫౪ ||

హ్రీంకారదుగ్ధాబ్ధిసుధా హ్రీంకారకమలేందిరా |
హ్రీంకారమణిదీపార్చిః హ్రీంకారతరుశారికా || ౫౫ ||

హ్రీంకారపేటకమణిః హ్రీంకారాదర్శబింబికా |
హ్రీంకారకోశాసిలతా హ్రీంకారాస్థాననర్తకీ || ౫౬ ||

హ్రీంకారశుక్తికాముక్తామణి-ర్హ్రీంకారబోధితా |
హ్రీంకారమయసౌవర్ణస్తంభవిద్రుమపుత్రికా || ౫౭ ||

హ్రీంకారవేదోపనిషద్ హ్రీంకారాధ్వరదక్షిణా |
హ్రీంకారనందనారామనవకల్పకవల్లరీ || ౫౮ ||

హ్రీంకారహిమవద్గంగా హ్రీంకారార్ణవకౌస్తుభా |
హ్రీంకారమంత్రసర్వస్వా హ్రీంకారపరసౌఖ్యదా || ౫౯ ||

 శ్రీ లలితా త్రిశతీ స్తోత్రరత్నం ఫలశృతి (ఉత్తర పీఠిక)

శ్రీ లలితా త్రిశతీ స్తోత్రరత్నం ఫలశృతి (ఉత్తర పీఠిక)

సూత ఉవాచ-
ఇతి హయముఖగీతం స్తోత్రరాజం నిశమ్య
ప్రగళితకలుషోభూచ్ఛిత్తపర్యాప్తి మేత్య |
నిజగురుమథ నత్వా కుంభజన్మా తదుక్తేః
పునరధికరహస్యం జ్ఞాతుమేవం జగాద || ౬౪ ||

అగస్త్య ఉవాచ-
అశ్వానన మహాభాగ రహస్యమపి మే వద |
శివవర్ణాని కాన్యత్ర శక్తివర్ణాని కాని హి || ౬౫ ||

ఉభయోరపి వర్ణాని కాని మే వద దేశిక |
ఇతి పృష్టః కుమ్భజేన హయగ్రీవోzవదత్పునః || ౬౬ ||

శ్రీ హయగ్రీవ ఉవాచ-
తవ గోప్యం కిమస్తీహ సాక్షాదంబాకటాక్షతః |
ఇదంత్వతిరహస్యం తే వక్ష్యామి శృణు కుంభజ || ౬౭ ||

ఏతద్విజ్ఞానమాత్రేణ శ్రీవిద్యా సిద్ధిదా భవేత్ |
కత్రయం హద్వయం చైవ శైవో భాగః ప్రకీర్తితః || ౬౮ ||

శక్త్యాక్షరాణి శేషాణి హ్రీఙ్కార ఉభయాత్మకః |
ఏవం విభాగమజ్ఞాత్వా శ్రీవిద్యాజపశీలినః || ౬౯ ||

న తేషాం సిద్ధిదా విద్యా కల్పకోటిశతైరపి |
చతుర్భిశ్శివచక్రైశ్చ శక్తిచక్రైశ్చ పంచభిః || ౭౦ ||

నవచక్రైస్తు సంసిద్ధం శ్రీచక్రం శివయోర్వపుః |
త్రికోణమష్టకోణం చ దశకోణద్వయం తథా || ౭౧ ||

చతుర్దశారం చైతాని శక్తిచక్రాణి పంచ వై |
బిందు శ్చాష్టదళం పద్మం పద్మం షోడశపత్రకమ్ || ౭౨ ||

చతురశ్రం చ చత్వారి శివచక్రాణ్యనుక్రమాత్ |
త్రికోణే బైందవం శ్లిష్టమష్టారేష్టదళాంబుజమ్ || ౭౩ ||

దశారయోష్షోడశారం భూపురం భువనాశ్రకే |
శైవానామపి శాక్తానాం చక్రాణాం చ పరస్పరమ్ || ౭౪ ||

అవినాభావసంబంధం యో జానాతి స చక్రవిత్ |
త్రికోణరూపిణీ శక్తిర్బిందురూపశ్శివస్స్మృతః || ౭౫ ||

అవినాభావసంబంధస్తస్మాద్బిందుత్రికోణయోః |
ఏవం విభాగమజ్ఞాత్వా శ్రీచక్రం యస్సమర్చయేత్ || ౭౬ ||

న తత్ఫలమవాప్నోతి లలితాంబా న తుష్యతి |
యే చ జానంతి లోకేస్మిన్ శ్రీవిద్యాం చక్రవేదినః || ౭౭ ||

సామాన్యవేదినస్తే వై విశేషజ్ఞోzతిదుర్లభః |
స్వయం విద్యావిశేషజ్ఞో విశేషజ్ఞం సమర్చయేత్ || ౭౮ ||

తస్త్మై దేయం తతో గ్రాహ్యం శ్రీవిద్యాచక్రవేదినా |
అంధం తమః ప్రవిశంతి యే హ్యవిద్యాముపాసతే || ౭౯ ||

ఇతి శ్రుతిరప్యాహైతా నవిద్యోపాసకాన్ పునః |
విద్యానుపాసకానేవ నిందత్యారుణికీ శ్రుతిః || ౮౦ ||

అశ్రుతాసశ్శ్రుతాసశ్చ యజ్వానో యేప్యయజ్వనః |
స్వర్యన్తోనాప్యపేక్షంత ఇంద్రమగ్నిం చ యే విదుః || ౮౧ ||

సికతా ఇవ సంయంతి రశ్మిభిస్సముదీరితాః |
అస్మాల్లోకాదముష్మాచ్చేత్యప్యాహారుణికీ శ్రుతిః || ౮౨ ||

యః ప్రాప్తః పృశ్నిభావం వా యది వా శంకరస్స్వయమ్ |
తేనైవ లభ్యతే విద్యా శ్రీమత్పంచదశాక్షరీ || ౮౩ ||

ఇతి తంత్రేషు బహుధా విద్యాయా మహిమోచ్యతే |
మోక్షైకహేతువిద్యా తు శ్రీవిద్యైవ న సంశయః || ౮౪ ||

న శిల్పాదిజ్ఞానయుక్తే విద్వచ్ఛబ్దః ప్రయుజ్యతే |
మోక్షైకహేతువిద్యా సా శ్రీవిద్యైవ న సంశయః || ౮౫ ||

తస్మాద్విద్యావిదే దద్యాత్ ఖ్యాపయేత్తద్గుణాన్సుధీః |
స్వయం విద్యావిశేషజ్ఞో విద్యామాహాత్మ్యవేద్యపి || ౮౬ ||

విద్యావిదం నార్చయేచ్చేత్కోవా తం పూజయేజ్జనః |
ప్రసంగాదేతదుక్తం తే ప్రకృతం శృణు కుంభజ || ౮౭ ||

యః కీర్తయేత్సకృద్భక్త్యా దివ్యం నామ్నాం శతత్రయమ్ |
తస్య పుణ్యఫలం వక్ష్యే విస్తరేణ ఘటోద్భవ || ౮౮ ||

రహస్యనామసాహస్రపాఠే యత్ఫల మీరితమ్ |
తత్కోటికోటిగుణీతమేకనామజపాద్భవేత్ || ౮౯ ||

కామేశ్వరాభ్యాం తదిదం కృతం నామశతత్రయమ్ |
నాన్యేన తులయేదేతత్స్తోత్రేణాన్యకృతేన తు || ౯౦ ||

శ్రియఃపరంపరా యస్య భావినీ తూత్తరోత్తరమ్ |
తేనైవ లభ్యతే నామ్నాం త్రిశతీ సర్వకామదా || ౯౧ ||

అస్యా నామ్నాం త్రిశత్యాస్తు మహిమా కేన వర్ణ్యతే |
యా స్వయం శివయోర్వక్త్రపద్మాభ్యాం పరినిస్సృతా || ౯౨ ||

నిత్యాషోడశికారూపాన్విప్రానాదౌ తు భోజయేత్ |
అభ్యక్తా గంధతైలేన స్నాతానుష్ణేన వారిణా || ౯౩ ||

అభ్యర్చ్య వస్త్రగంధాద్యైః కామేశ్వర్యాదినామభిః |
అపూపైశ్శర్కరాద్యైశ్చ ఫలైః పుష్పైస్సుగంధిభిః || ౯౪ ||

విద్యావిదో విశేషేణ భోజయేత్షోడశ ద్విజాః |
ఏవం నిత్యబలిం కుర్యాదాదౌ బ్రాహ్మణభోజనే || ౯౫ ||

పశ్చాత్త్రిశత్యా నామ్నాం తు బ్రాహ్మణాన్ క్రమశోzర్చయేత్ |
తైలాభ్యంగాదికం దద్యాద్విభవే సతి భక్తితః || ౯౬ ||

శుక్ల ప్రతిపదారభ్య పౌర్ణమాస్యవధి క్రమాత్ |
దివసే దివసే విప్రా భోజ్యా వింశతిసంఖ్యయా || ౯౭ ||

దశభిః పంచభిర్వాపి త్రిభిరేకేన వా దినైః |
త్రింశత్షష్ఠిశతం విప్రాన్ భోజయేత్త్రిశతం క్రమాత్ || ౯౮ ||

ఏవం యః కురుతే భక్త్యా జన్మమధ్యే సకృన్నరః |
తస్యైవ సఫలం జన్మ ముక్తిస్తస్య కరే స్థితా || ౯౯ ||

రహస్యనామసాహస్రైరర్చనేప్యేవమేవ హి |
ఆదౌ నిత్యబలిం కుర్యాత్పశ్చాద్బ్రాహ్మణభోజనమ్ || ౧౦౦ ||

రహస్యనామసాహస్రమహిమా యో మయోదితః |
సశీకరాణురత్రైకనామ్నో మహిమవారిధేః || ౧౦౧ ||

వాగ్దేవీరచితే నామసాహస్రే యద్యదీరితమ్ |
తత్తత్ఫలమవాప్నోతి నామ్నోప్యేకస్య కీర్తనాత్ || ౧౦౨ ||

ఏతదన్యైర్జపైః స్తోత్రైరర్చనైర్యత్ఫలం భవేత్ |
తత్ఫలం కోటిగుణితం భవేన్నామశతత్రయాత్ || ౧౦౩ ||

రహస్యనామసాహస్రకోట్యావృత్త్యాస్తు యత్ఫలమ్ |
తద్భవేత్కోటిగుణితం నామత్రిశతకీర్తనాత్ || ౧౦౪ ||

వాగ్దేవీరచితే స్తోత్రే తాదృశో మహిమా యది |
సాక్షాత్కామేశకామేశీకృతేzస్మిన్ గృహ్యతామితి || ౧౦౫ ||

సకృత్సంకీర్తనాదేవ నామ్నామస్మిన్ శతత్రయే |
భవేచ్చిత్తస్య పర్యాప్తిర్నూనమన్యానపేక్షిణీ || ౧౦౬ ||

న జ్ఞాతవ్యమితస్త్వన్యజ్జగత్సర్వం చ కుంభజ |
యద్యత్సాధ్యతమం కార్యం తత్తదర్థమిదం జపేత్ || ౧౦౭ ||

తత్తత్సిద్ధిమవాప్నోతి పశ్చాత్కార్యం పరీక్షయేత్ |
యే యే ప్రసంగాస్తంత్రేషు తైస్తైర్యత్సాధ్యతే ధ్రువమ్ || ౧౦౮ ||

తత్సర్వం సిద్ధ్యతి క్షిప్రం నామత్రిశతకీర్తనాత్ |
ఆయుష్కరం పుష్టికరం పుత్రదం వశ్యకారకమ్ || ౧౦౯ ||

విద్యాప్రదం కీర్తికరం సుకవిత్వప్రదాయకమ్ |
సర్వసంపత్ప్రదం సర్వభోగదం సర్వసౌఖ్యదమ్ || ౧౧౦ ||

సర్వాభీష్టప్రదం చైవ దేవీనామశతత్రయమ్ |
ఏతజ్జపపరో భూయాన్నాన్యదిచ్ఛేత్కదాచన || ౧౧౧ ||

ఏతత్కీర్తనసంతుష్టా శ్రీదేవీ లలితాంబికా |
భక్తస్య యద్యదిష్టం స్యాత్తత్తత్పూరయతే ధ్రువమ్ || ౧౧౨ ||

తస్మాత్కుంభోద్భవమునే కీర్తయత్వమిదం సదా |
అపరం కించిదపి తే బోద్ధవ్యం నాzవశిష్యతే || ౧౧౩ ||

ఇతి తే కథితం స్తోత్రం లలితాప్రీతిదాయకమ్ |
నాzవిద్యావేదినే బ్రూయాన్నాzభక్తాయ కదాచన || ౧౧౪ ||

న శఠాయ న దుష్టాయ నాzవిశ్వాసాయ కర్హిచిత్ |
యో బ్రూయాత్త్రిశతీం నామ్నాం తస్యానర్థో మహాన్భవేత్ || ౧౧౫ ||

ఇత్యాజ్ఞా శాంకరీ ప్రోక్తా తస్మాద్గోప్యమిదం త్వయా |
లలితాప్రేరితేనైవ మయోక్తం స్తోత్రముత్తమమ్ || ౧౧౬ ||

రహస్యనామసాహస్రాదతిగోప్యమిదం మునే |
ఏవముక్త్వా హయగ్రీవః కుంభజం తాపసోత్తమమ్ || ౧౧౭ ||

స్తోత్రేణానేన లలితాం స్తుత్వా త్రిపురసుందరీమ్ |
ఆనందలహరీమగ్నమానసస్సమవర్తత || ౧౧౮ ||

ఇతి బ్రహ్మాండపురాణే - ఉత్తరఖండే - హయగ్రీవాగస్త్యసంవాదే -
లలితోపాఖ్యానే - స్తోత్రఖండే - లలితాంబాత్రిసతీస్తోత్రరత్నం సమాప్తమ్ ||